1. zum Inhalt
Sie sind hier: Kölsch-Bibliothek > Unterhaltung op Kölsch > Gereimte Saache un jet zo laache - Gedichte und Glossen

Gereimte Saache un jet zo laache - Gedichte und Glossen

Kölsche Spetzname

Wenn mich einer fröch: "Kennste dä X",
dann säht mir dat doch meistens nix.
Doch wenn hä dann dä Spetzname nennt,
weiß jeder tireck, offmer dä kennt.
Denn jeder Kölsche hätt nur su zum Spaß,
noch ene Extra-Name, dä joot zu ihm paß.

Do jitt et "die Trumm" oder och "die Trööt",
dat es einer dä jähn Musik mäht.
Dä "Schmaal" och "Spargeltarzan" jenannt,
es für sing schlanke Linie bekannt.

Dä "Fuss" hät de falsche Panne om Daach,
dä "Grielächer" jähn üvver andere laach.
Dä "Plaaat" ihren Haupteshaaresmangel,
dä zeuch vun Puff un TingeltangeL

Die "Duuv" die hät schnell dä Abfluch gemaat,
un hat keinem jet dovun jesaat.
Dä Blender". es miestens stief un staats.
un arbeid - wenn schun - miestens naachs.

Dojegen waat dä "Liebeskummer"
Noch immer op sing jroße Nummer.
Ne jroße Zinke hät die "Naas",
die steck hä beim drinke deef in et Jlas.

Dat "Schneeflöckche", dat weiß ein jeder,
es esu leicht wie eine Feder,
dojegen hätt dä "Kastekopp"
enen eckigen Ääpel boven drop.

Deshalb spillt et kein Roll, wie mer sich nennt,
wenn mer nur singen "richtige" Name kennt.
Die "Äähz", die "Bunn", oder dä "Büggel",
die "Flitsch", die "Knoll", dä "Tütenüggel".
In Kölle hät eben jedermann,
ene Name. dä mer sich och merke kann.

nach oben

Dr Köbes

Et jitt ene Kähl, dä jeder kennt
Un dä mer in Kölle "Köbes" nennt.
Dat heiß eijentlich Jakob, doch su nennt mer se all.
Ob Schäng, ob Pitter, ob Hannibal.

Hä hät im Bräues et Regiment
un et es joot, wenn hä dich kennt.
Denn hä entscheidet im Fall der Fälle
üvver Kölsch, Halven Hahn un Frikadelle.

Em Sommer, em blaue Hemb adrett
en lange Schützel, dr Schlössel an dr Kett.
Im Winter en blauwülle Jack aanjedonn,
su sieht mer en dann am Zapphahn stonn.

He füllt hä die Stanje em zinnerne Kranz,
huh gezapp die Gläser em güldene Jlanz
Et Kölsch schümp huh, et leckere Bierche,
für Alt un Jung e äsch Pläsierche.

Un damit Temperatur un Geschmack deiht stemme
Deiht och dr Köbes jään e Jlas nehmme.
Dann luurt hä dr Gast an met treuem Bleck
un säht: "E besje kühl es et widder hück".

Hä brängk dir dann Flöns oder Levverwoosch,
un Kölsch im Kranz , fresch für dr Doosch.
Doch wie un wann, dat es sing Saach
Dröm freu Dich, wenn dr Köbes laach.

Doch e paar Gesetze muß Do kapiere,
öm Dich im Bräues nit zo blamiere.
Roof nie "Wo bleibt mein Bier, Herr Ober?"
Et künnt sinn, du waats bes Oktober.

Doch alles in allem kannst Du ihn nit misse,
hä surch für die Wohl op Ihr un Jewesse,
hä surch für die Esse un dingen Doosch,
hä es alles in allem, ene prächtije Poosch.

nach oben

E besje jeck

Mer säht dr Kölsche hätt vill Humor,
doch dat es nit janz esu richtich,
nur eines stemp, mer freuen jähn,
ävver nemmen uns nit esu wichtich.
Mer laache och bes zum Hals em Dreck,
.. mir sin eben emmer e besje Jeck.

Am Ruusemondaach do stonn mr am Zoch,
do weeden de Strüßjer jeschnapp,
de Mamm kritt ene decke Ball op et Ooch,
un en Tafel Schukelaad dr Papp.
Do weed sich no de kleinste Kamelle jereck,
... mir sin eben immer e besje jeck.

Em Gürzenich drinke mer Sekt un Wing,
jede Sitzung kost e Vermööje
doch mr muß jo dobei gewääse sin
bei dem stiefe Fastelovends-Vergnööje
Mir fiere trotz Schulde bes an de Deck,
... mir sin eben immer e besje jeck.

Un wenn mer einst vor dr Himmels-Pootz stonn
un saaje; Petrus, kumm loß uns erenn,
dann säht hä: Jo, Junge loßt nur jonn,
ich han üch schon kumme jesinn.
Setzt üch doch dohingen met mir en de Eck,
... och ich bin nämlich - e besje jeck.

nach oben

Wenn ich fleeje künnt ...

... flööch ich üvver Wies un Felder,
üvver Birch un üvver Wälder,
huh im helle Sunnesching.
Nevve mir ene Schwarm vun Finke,
die mir met de Flüjele winke
unger mir dr Vatter Rhing.

... flööch ich üvver Dom un Bröcke,
die janz noh zusamme röcke
un tireck zum Hemmel op.
Üvver Plätz un üvver Stroße,
däht ich dann jet falle loße –
irjend einem op dr Kopp.

nach oben

Dun mer nix verzälle

Für manche Lück et nix schöneres jitt,
wenn et nur fähn vun dr Heimat litt.
In NewYork üvver dr Broadway jonn,
in Rom vürm Kolosseum stonn.
In Paris ens op dr Eiffelturm klemme
in London dürch de Themse schwemme.
Met der Seilbahn op dr Zuckerhoot,
no’m Amazonas met dem Boot
Me’m Rucksach op dr Himalaya
un dann me’m Rad an de Biskaya
Om Esel quer dürch Turkistan,
dann wigger met dr Iesebahn.
Späder künne se vill berichte
die interessanteste Geschichte ...
... die künne mir all vill verzälle,
et jitt nix schöneres als Kölle

nach oben

Klünjele

Am Rhing, ävver och em janze Land
es dr Kölsche Klünjel joot bekannt.
Mer hätt sing Fründe en dr Partei,
ob ruut, ob schwatz es einerlei.
Beim Hännesje-Thiater un beim FC,
bei dr Fortuna un dr KVB.

Om Amp un bei dr Feuerwehr,
Ne joode Schullfründ hilf do sehr.
Die Knöllchensfrau om Eijelstein,
dat es die Frau vun unserm Hein.
Mer klünjelt em Dom un en dr Bütt,
wie schön dat et dat in Kölle jitt.

De Sproch beim klünjele es Kölsch,
Hochdeutsch mäht do nur Gemölch.
Doch halt beim Klünjele stets Moß
Un denk, et es kein Einbahnstroß
Su klünjelt he jeder su joot hä kann,
e Jlöck dat mer dä Klünjel hann!

Doch manche Immi versteiht dat nit,
dat mer och ens jet dä andere jitt,
un mit nur alles in de eijene Täsch,
suns lands de plötzlich en dr Blech.
Denn in Kölle weiß dr dümmste Püngel:
Korruption es keine Klünjel

nach oben

Alte Kölsche Klünjelweisheit

"Die jet saaje wisse nix -
un die jet wisse saaje nix!"

nach oben

Ne decke Kopp

Näää, wat wor dat jester widder spät !
Ene feuchtfröhliche Ovend – wie mer su säht
Mer schwaad, mer iß, mer drink, mer laach
Un plötzlich es et Medderrnaach.

Mer jeiht no Hus, mäht sich kein Sorje
Läät sich en et Bett un denk nit an Morje.
Waach op in dr Fröh un föhlt sich mies
Lurt in dr Speegel, et Geseech kalkwieß.

De Auje sin ruut, de Knee sin weich
De Hoar dun dr wieh, dr Teng es bleich,
dr Hals es drüch, dr Kopp es schwer,
Nu muß e wirksam Meddel her.

Dr Ehzte schwört op e Aspirin,
dr Zweite läht sich widder hin,
dr Dritte drink ene Majelikör
dr Vierte geiht einfach nom Frisör,
dr Fünfte drink vier Flasche Sprudel
dr Sechste spillt met singem Pudel,
dr Sibbte dä verflucht dr Suff
dr Achte well nur fresche Luff
dr Nüngte ne Sure Hirring bestellt
dr Zehnte zählt si Taschejeld
dr Elfte meld sich pötzlich krank
un läht sich op de Sonnebank
Nur dä Zwölfte, dä es schlau,
denn dä weiß dat eine janz genau:
Drei Tage is dr Vater krank,
nu süff hä widder –Jott sei Dank!

nach oben

Wemmer bedenk...

Wemmer bedenk, wat et all jitt,
wievill Heu mer op ene Wage kritt.
wievill Kamelle im Karneval fleeje,
wievill hundert decke Wiever weeje
…. un dat janze andere Spill
dann sin doch e paar Jlas Kölsch nit vill!

Wemmer bedenk, wievill Müs en Katz fängk,
un wieviel Wasser dr Rhing met sich brängk,
wievill Stuß uns de Politiker verzälle,
die ahle - un die neu Kamelle
…. un dat janze andere Spill
dann sin doch e paar Jlas Kölsch nit vill!

Wemmer bedenk, wievill Witze mr kennt,
wie oft mer op dr Lokus rennt,
Wie lang mr in dr Weetschaft setz,
wievill mr bei dr Arbeid schwetz
.… un dat janze andere Spill
dann sin doch e paar Jlas Kölsch nit vill!

Wemmer bedenk, wie lang iewich is,
wie oft mer em Levve jet verjiß,
un wie oft mer op dr Köbes waat,
wievill dummes Zeuch mer schwaat
…. un dat janze andere Spill
dann sin doch e paar Jlas Kölsch nit vill!

Wemmer bedenk, wie koot et Levve sin kann,
un wie schnell mr de Fründe verjesse han,
wat mr noch all hätt joot wolle maache,
die kleine un die jruße Saache
…. un dat janze andere Spill
dann sin doch e paar Jlas Kölsch nit vill!

nach oben

Ene joode Fründ

Mer kann nit immer löstich sinn
un iwich bovvenop,
hin un widder schleiht et Schicksal zo
un häut dich op dr Kopp.

Dann darfste nit dr Moot verliere
un nit de Loss am Laache,
et kütt och widder andersröm
un du kanns Freud dr maache.

Doch wenn et ja nit wigger will
Un dir nur Sorje winke,
dann treff dich met enem joode Fründ
un dunn e Jläsje drinke.

Drinkt e paar Bier, ob Kölsch ob Wieß,
de Zort es janz ejal,
ene Verzell, ene joode Rot,
hilf bei so mancher Qual.

Doch wenn et widder besser geiht
Un all de Sorch verjesse
Verjiß en nit, dä joode Fründ,
dä bei Dir hätt jesesse

Un wenn dä ens ding Hilfe bruch,
beß och tireck zur Stell,
Hür dir dann och sing Surje aan
Un hilf och du ihm schnell.

nach oben

Et Jlöck

Wenn einer frööch, wat es et Jlöck,
dann hürste allerhand Saache.
Dä eine säht, e neu Paar Söck,
dä andere, jet ze laache.

Ne Haufe Jeld, en joode Frau,
un jootjerode Kinder,
en Limousien, en Fläsch Schabau,
ne Buurehoff met Rinder.

Dä Jäckpott en dr Lotterie,
en Naach mit Tuttifrutti,
iewich jesund un emmer stramm
un keine Ärger met dr Mutti.

Ne Parkplatz janz für dich allein,
ne Ehrenplatz im Himmel,
ne immerwährende Führerschein,
e Fahrad met ener Bimmel.

Beim Knoobele ne Sechser-Pasch,
beim Grang de beste Buure,
beim Nullovär de kleinste Kaat,
un Skäter die nit muure.

En decke Trumm em Fasteleer,
für durch de Stroß zo schluffe,
dä Aschermettwoch nit su schwer
dann künnt mer wigger suffe.

Et Jlöck dat es en kleine Saach,
dat weiß doch jeder Mann,
mer schwaad, mer drink, mr laach
un wat mr suns noch hann.

E Jläsje Kölsch, ne Halve Hahn,
Dat sin bescheidene Wünsche
ob riche oder ärme Mann,
…. mer sin doch alles Minsche.

nach oben

Immer nur Kölle

Losse mer jet durch Kölle wandere
vun einem Bräues in et andere:
Vum Dom erav zom Jan vun Wäht,
dä waht noch immer op si Pääd.
Dobei e paar Kölsch, ne halve Hahn,
do kütt esu schnell nix jägen ahn.

Losse mer jet üvver Kölle schwaade
üvver Jott un de Welt un e paar vun dä Kraade:
Dä Hein, dä Pitter un dä Schäng,
dat Züff un singe Schiselaweng.
Dobei e paar Kölsch, ne halve Hahn,
do kütt esu schnell nix jägen ahn.

Losse mer jet üvver Kölle laache,
wat se dun un wat se maache:
Die Präsedente un Honoratiore,
un die Boore wie se loore.
Dobei e paar Kölsch, ne halve Hahn
do kütt esu schnell nix jägen ahn.

Losse mer jet üvver Kölle schänge
die kölsche Siel zom koche bränge:
De Stüür, de Pries un der FC,
kein Arbeit, nix em Portemoneie.
Dobei e paar Kölsch, ne halve Hahn,
do kütt esu schnell nix jägen ahn.

Losse mer immer zo Kölle stonn,
wenn och ens schleech de Zigge jonn:
Denn iede Kölsche - ob Mann ob Frau,
die wessen eines janz genau:
E paar Jläser Kölsch, ne halve Hahn,
do kütt esu schnell nix jägen ahn.

nach oben

En Bien em Bier

Du setz em Jaade un drinks dr e Bier,
do kütt et jeflooje, dat lästige Dier.
Et summp un brump eröm öm et Jlas
Stipp dr Rüssel eren, un dann de Naas

Du denks an dä Stachel, en decke Lepp,
schnell dr Deckel op et Jlas gekipp
un düchtig jeschöddelt dat volle Jlas,
dann versüff et em Bier, dat gierije Aas

Doch dann häste Mitleid un denks dr nur,
se hätt doch och Doosch, die Kreatur,
ihr schmeck et doch och, dat lecker Bierche,
Dröm jönn och dem Diersche sie Pläsierche

Die Bien süff un süff un hürt nit mieh op,
Du klopps ihr ärgerlich op dr Kopp
do mäht se ne Köpper tirek en die Flut –
eijentlich doch enen schönen Duud.

nach oben

Kölsche Tillikatesse

En Kölle do jitt et leckere Saache,
die Minsche satt un jlöcklich maache.
Zo Huss oder em Bräues beim Will,
dr Kölsche müffelt jään joot un vill.
Kein Fisematentcher un fremde Stuss,
eine Rievkooche es ene Genuss.
Kölsche han Spass an Esse un Drinke,
die Fooderkaat läss de Auge blinke.
Name allein klinge wie Schalmeie,
mer kann sich schon am Klang erfreue:

Kotlett, Broade un Karbonaad,
Schinkeschnettche un Ääpelschlaat.
Pannekooche, lecker Sülze
Schnitzel met un ohne Pilze.
Decke Bunne, met vill Speck,
Suure Kappes un sööße Weck.
Solei, Flöns met Öllichringen
Levverwoosch – vor allen Dingen,
schmecken jedem kölsche Jung,
bringen Wohltat op de Zung.
Düchtig Mostert pass dobei,
sööß oder scharf es einerlei.
Denn dr Senf hilft jedem Maaje,
fettich Esse zo verdraaje.

Züppche liebt ein jeder Mann,
jedes Fettauch laach dich an.
Rindfleischzupp mit Fleisch un Knoche
wie zo Hus de Mamm dät koche,
Höhnerbröh vun janze Höhner,
keine Anblick es do schöner.
Un och Ähze-, Bunne, Linse,
weiß ein jeder jo: dat sin se!
Nit nur Friedaachs jitt et Fesch,
dä kütt öfters op dr Desch
Matjes-Hirring, zart un mild
Met jett Schwazzbruut, wat e Bild!

Rotbarsch, Zander, Kabbeljau,
Forelle: "Müllerin" oder "blau".
Zwei drei Schabau zum joode Schluss,
weil dr Fesch jo schwemme muss.
In jeder Weetschaff, dat es klor,
jitt et, wie et immer wor:
Gebacke Flöns met Himmel un Ääd,
mr iß esu vill, wie mr verdräät.
Goldich Öllich, leckere Zaus,
es dr kölsche Lieblingsschmaus.
E paar Jlas KölschBier dozo jesetz,
do laach jedes kölsche Hätz.
Einmol de Woch, do jitt et Hämche,
dann kütt dr Chef met dem Madämche.
Setzen do - ich kann et beschwöre,
als wenn se am verhungere wöre.
Steiht dann dat Hämche vür dr Naas,
gevven se su richtig Gas:
Et Gespräch verstumb, et es janz stell,
weil keiner vor Andaach jet saaje well.
Mer konzentriert sich op et Esse
Un deiht de janze Welt verjesse.
Mr iß un drink, met Fett am Mungk,
Dä Knoche kritt am Engk dr Hungk.
Dohinger ´ne Schabau gedrunke,
dem Köbes freundlich zojewunke:
"Op einem Bein kann mer nit stonn,
dröm leeve Köbes, flöck loss jonn!"
Doch ein Saach jeder Kölsche maach,
die kann hä esse jeden Daach:
Morjens, ovends, nevenaan,
mer nennt et ene "Halve Hahn":
E Röggelche met Holländer Kies,
dat schmeck uns wie em Paradies,
un e lecker Kölsch donevve:
"Et jitt nix Schöneres em Levve"!

FM

nach oben